充電湯之旅 (二)

第二日…
之前o個晚都訓得麻麻地
因為成晚行雷
嘈到死

朝早七點幾就起身
起左身就換衫落去食早餐
早餐係自助形式
係我地o既套票包的
講明包埋就預左無乜特別啦
不過D餅仔都幾好食

食完之後
當然又上返房換衫落去再浸
不過呢個時候竟然落雨
雖然之前o個日都不停咁落緊毛毛雨
不過呢一日似乎越落越大

我地都係四圍浸，四圍嘆
真係好舒服
不過可惜o既係
中途D雨真係幾大
我地幾個要搵D有得遮頭o既泉黎避雨
每次一行出黎
又有工作人員拎住把遮埋黎
真係好貼心

於早中段我地係去左休息室坐o既
休息室其實都好值得一提
要去休息室首先要行返入去更衣室
入到去抹乾個身
問D職員拎套衫
就可以行入去

裡面好暖好舒服
有咖啡奶茶三文治水果
只要叫個服務員
好快就會有
重點係：免費

大少食完碟 apple
好滿足咁又出去繼續了
我地浸到大約十一點半就離開了
返上房之後
沖個涼換返衫
又再hea一陣…

《等 checkout留影》
一家人扮訓覺
☆請留意右手邊的係廁所
打開左簾的話係乜都睇哂的

張臺都幾好用，夠大張

兩母子研究下地圖先

大少自拍照

Hea 到差唔多一點就落去 check out 了
Check out 時真係好多人呢~
之後就又去食飯了

《是日午餐》
翻兜：籠仔蒸菜心
☆無之前o個晚咁鹹，仲好味！
翻兜：御泉炒飯
☆大少未坐落就話要食，都係食左四碗
妙齡BB鴿
☆好味！！

蒜香骨
☆一件一件叫的，你要幾多件就叫幾多件。水準之作，好味！

因為訂左三點幾車走
食完飯仲有時間
就四圍行下影下相~

《等車留影》
御溫泉門外留個影先~ 到此一遊！

入溫泉之前的大水車

返 Lobby 等上車，大少依然興奮

之後差唔多三點已經可以上車
坐返七十分鐘車出去九洲港口岸
跟住過關去等上船

哈，等船時我地見到文雋
白哂頭了
同一個後生Do既女人一齊
抱住個小妹妹~

之後我地坐多七十分鐘船
就返到中港城了~

仲有一點值得一提o既係
我兩程船就貼住暈浪貼，所以無暈船浪
而大少就兩程都戴住暈浪手帶再加上用老公個貼肚臍方法
都完全無事
老公就用撒隆巴斯貼住肚臍
一樣OK！
(呢個係網上流傳o既方法黎
聞說如果暈得勁
可以o係撒隆巴斯洒D鹽先貼)

旅程圓滿結束！
多謝收睇

Filed under 遊玩, 推介 |