充電湯之旅 (一)

日期：2月6日~ 7日
地點：珠海御溫泉

剛剛過去的星期六日
我地一家三口去左珠海玩
其實由上年去完日本o既溫泉樂園之後
大少都好鍾意浸溫泉
所以呢次趁有機會
我地就去試下

之前老公o係網上面找左好多資料
同埋睇過好多人o既評價
見到呢度都好好
所以就決定地點

我地星期六朝早
等大少上完學校o既畫班
就拿拿聲出發了
(大少學完畫畫出黎
老師話佢已經好興奮咁同人講佢去旅行)

十點半左右出到尖沙咀中港城
泊好架車，攪埋日泊程序
我地就上去出境

《大少等上船》

大約十一點半
準時上船
經過七十分鐘o既船程
好快就到珠海
其實成程船，除左香港海域拋得勁之外
大部份時間都好穩定
加上老公一早幫我買定暈浪貼
(一早起身就要貼住)
同埋買左暈浪手帶俾阿B
所以一家人安全到達
完全無暈無嘔！讚！

落左船過埋關都差唔多一點
仲有一個鐘先有車
於是就o係碼頭搵食
碼頭有 KFC 同真功夫
為免熱氣喉嚨痛
所以我地就同大少去真功夫食蒸飯
我食開o個間可以加一蚊將個生菜轉西蘭花
不過呢間竟然唔得
有少少唔開心添~

食完出黎見到
兩架白色旅遊巴，車身寫住御溫泉
可以上車lu~

車程都係大約七十分鐘
舒舒服服咁就到左我地o既目的地了
我地今次入住o既係雲來客棧
老公話本來想訂御溫泉o既VIP房
不過訂o個時已經客滿
所以就選較新o既雲來客棧

入到大堂
就有人招呼我地成車人坐低休息
然後有服務員埋黎幫我地 check-in

《雲來客棧 - 大堂》

辦完手續，交左按金，訂埋第二日離開o既車程
就可以上房了

上到房，真係哇一聲
真係幾靚架

《日式房間》

《大少的基地》
佢話佢揸飛機喎~

我地休息左一陣
就落去睇下有咩行有咩睇

《大少拉車仔》

《客棧門外的驢仔》

行左一陣返上房攤多陣
原本諗住早少少去食飯之後去浸
不過未夠五點我已經頂唔順
我同老公講
不如浸一陣先食飯啦

於是就換衫落去溫泉了
去到更衣室，除左浴衣
著住件泳衣就行出去啦
個小姐叫住我
好體貼咁話外面有點冷
俾條毛巾我披住行出去
(其實大家唔好學我
我完全無左要沖左涼先出去呢回事
咁樣係唔o岩的)

出到去
老公未出黎
我就先去暖身池浸住等啦
等到佢地出黎
就四圍去浸下
有名花池、咖啡池、香薰池、名酒池、名木池、
椰奶池、六福湯 (六種唔同o既中藥池)、瓜果池、
死海鹽池… 等等
一個浸一陣都有牌你浸

我地浸到大約六點
就返去換衫落去食晚餐
原未諗住食完再去
不過大少食食下已經見眼訓
咁就打消左呢個念頭了

《古靈精怪大大少》

《是日晚餐》
前菜 - 花生 & 爽脆辣魚皮
☆個魚皮好脆，不過我覺得辣左D，花生普通啦

籠仔蒸菜心
☆勁！好味！不過略鹹

乳香蔥肉 (唔記得 exactly 個名，類似係咁啦~)
☆都幾好味，不過拼埋其他野就比左落去

御泉炒飯
☆炒得唔錯，大少勁鍾意，眼訓都食左四碗仔！

泥煨雞
☆味道唔錯，好滑！

食完飯我地就去研究邊度燒煙花
原來呢度規定夜晚8點至11點先可以放
未夠鐘… 又返房 hea

等到八點我地就行過去另外o個座天台
上到天台煙花店
哇，全部都係D大大盒的煙花炮
最簡單o個個都一百零幾蚊十幾發
於是問下有無細D o既
最後買左廿八蚊一大紮o既手持煙花
跟住仲有對哥哥姐姐玩淨半紮俾埋大少
之後我地見到有個爸爸帶住個小妹妹上黎
又分左D俾佢地玩

《大少玩煙花》

用煙花寫左個好有型o既 A 字呢~

大少隻豬仔懵下懵下
辣到個下巴仔一下
之後又俾D火花辣到手仔就唔敢玩了

我地玩玩下
竟然有人放個廿幾發的大煙花
就o係頭頂度爆
好鬼響，原本我都唔驚
不過D風吹我地呢邊
我驚D火花跌返落黎
於是就捉住大少走遠D睇

玩完之後行返落去
又有另一D人放大煙花
離遠少少睇感覺就無咁大壓迫感
不過泊樓下D車就唔係咁講了
有幾架都驚到喊呢~

返到房
大少就嘆零食
然後沖涼訓覺
大家都好快訓著左了

( 待續… )

Filed under 遊玩, 推介 |